O‘ZBEKISTON INTERNET NASHRLARIDA INSON HUQUQLARI TALQINI

Abstract:

Mazkur tadqiqot XXI asr sharoitida O‘zbekistonda inson huquqlari sohasida amalga oshirilayotgan normativ-huquqiy va institutsional islohotlarning mazmun-mohiyatini hamda ularning internet jurnalistikasi orqali yoritilish xususiyatlarini tahlil qiladi. So‘nggi yillarda mamlakatda milliy qonunchilikni xalqaro standartlarga uyg‘unlashtirish, sud-huquq tizimini isloh qilish, gender tenglikni ta’minlash va ijtimoiy himoyaga muhtoj qatlamlar huquqlarini mustahkamlash yo‘nalishida muhim qadamlar tashlandi. BMT Inson huquqlari bo‘yicha kengashi doirasidagi chiqishlar va “Inson huquqlari bo‘yicha milliy strategiya”ning qabul qilinishi O‘zbekistonning xalqaro majburiyatlarga sodiqligini namoyon etadi. Tadqiqotda internet OAVlarning inson huquqlarini yoritishdagi kommunikativ va nazorat funksiyasi alohida e’tiborga olinadi. Raqamli platformalarda surishtiruv reportajlari, faktcheking, tahliliy maqolalar va multimediya vositalari orqali davlat organlari faoliyatining jamoatchilik monitoringi kuchaygani ko‘rsatiladi. Xususan, so‘z erkinligi va media nazorati masalalarini yoritgan materiallar “hushyor erkinlik” modelining shakllanayotganini anglatadi. Shu bilan birga, ayrim mavzularning yetarlicha qamrab olinmasligi tematik nomutanosiblik mavjudligini ko‘rsatadi. Umuman olganda, internet jurnalistikasi O‘zbekistonda inson huquqlarini himoya qilish jarayonining ajralmas tarkibiy qismiga aylanib, huquqiy modernizatsiya va demokratik rivojlanish indikatoriga aylanishi ilmiy asosda xulosa qilinadi.