Қосықтың ең тийкарғы элементлериниң бири уйқас болып табылады. Уйқассыз қосық болмайды. Әлбетте, қосық қурылысы бойынша ырғақ, уйқас, өлшем ҳәм бәнт сыяқлы элементлерден ибарат. Поэтикалық сөздиң көркемлигин тәмийинлеўде ырғақ ҳәм өлшем сыяқлы уйқас да белгили дәрежеде функция ийе. Уйқас ырғақ пенен бирге қосықтың ядланыў мүмкиншилигине де айрықша хызмет атқарады. Уйқас поэзияға өзинше көркемлик бағышлап, оның оқыўшы яки тыңлаўшыға тийгизетуғын эмоционаллық тәсиршеңлигин де арттырады.